Rhamsa a thii ve thlangvang eng aa u soe thlangvang eng toe am aa hue.Rhamsa a thii ve aa tueng aw? Leviticus 17:10-14

Rhamsa a thii ve thlangvang eng aa u soe thlangvang eng toe am aa hue.Rhamsa a thii ve aa tueng aw? Leviticus 17:10-14

    Pa Khawsa eng a seh thaemkhi boeih Tuisu rhamsa, Chuu ak pha, thingkhu phanhah moe toi a ankhi boeih aa hamna ni ngah nakkhi hue.A vekkhi ve ni hamna a seh rhoe ni (Gen.9:2-3).  Cenamoe soenum rhamsa thii toe koeh aa rhoe rhoe hamna moe ak aa toe rhamsa thii phu ce yook hlue hue ti hue ( Gen. 9:4-6).A hoei boeih ni hamna moe ni aa a hamna sep loei noeh ii a tioeh aw rhamsa a thi koeh aa uh a ti hue?

    Khawsa awi Cim Baibul khui oeh ni huh oehtoe rhamsa a thii ve hueihhlurnak (offering, sacrifice) a hamna a awm a dawngoeh ni. Toi a ankhi anglak oeh rhamsa thii eng hueihhlur ve Pa Khawsa ak kaw ngahnak ni( Gen.4: 4-5).  Thii eng hueihhlurnak poh hamna Pa Khawsa eng Israel caakhi venna a nak thoeh lo hue. Mosi moe Aaron a venna Israel caakhi eng ani poh ham vemueihna ti hue. Israel caakhi ani Im hai oeh Tuu thii ce Chomkaeng ang lung oeh matna moe voeivang ( a xing tung moe a rham tung) oeh mat mat na , Im hai oeh pakthumna nanim hluk hamna awm hue. Acoeh ce nani im loen ta kong nueng soetoe nat a noinak moe kueikanak eng amnipha hluekhi hue ti hue (Exo. 12: 7, 12- 13, 22- 23). Thii ve hueihhlurnak hamna Pa Khawsa eng a nak thoeh lo a dawngoeh thii koeh aa uh a tina awm hue. Mosi moe Aaron a venna Boipa eng a ti toe, Tuu, Mee, Vasoei ak tha (fat in English) a saa ce koeh aa uh, rhamsa a thii rhoe rhoe ce koeh aa kom ukte. Rhamsa ak tha a Saa moe a thii ak aa toe ak thlangphun khui oehkoe eng haengna( thoengna) ak awm hlue ni ti hue ( Lev. 7:22- 27).

    Levitikar 17: 10 - 14, khui oeh awm rhamsa a thii rhoe rhoe ve koeh aa a hamna awipaek na ana awm hue. Thii ve na xingnak ang yuengna anik loer sakna a awmnak a dawngoeh, thii ak aa toe ak thlangphun khui oehkoe eng haeng na awm hlue hue ti hue.

    Thii moe khyin ak tha ve Pa Khawsa hai oeh hueihhlurnak a hamna ani honak a dawngoeh thlang eng aa hamna amni ngahnakkhi hue. Israel caakhi eng kum oet oeh kutoet hueihhlutnak (Lev.16:34), thlang thawlhkhi a hamna moe Khawsa kueihcahnak a hamna rhamsa a thii moe ak plan ce ani honak a dawngoeh a thii moe ak plan a saa koeh aa rhoe rhoe uh tinoeh awi ani paekkhina awm hue.A coehtoe tuh oeh nang moe kaa eng toe thii ve nik aa hlue aw?

    Ani lungnakkhi ak cam oeh ni thawlh khui oehkoe'ng a thii'm cim eng ni thongkhi hue (Awiph. 1:5). Pa Khawsa a lungnak ak cam eng ni thawlhkhui oeh ak thina niawm hui oeh, a Capa Jesuh khrih ni hamna tuei lo noeh, ni thongkhi hue. Tuisu rhamsa (Tuu, Mee, Vasoei )khi a thii moe Suuikhi , tangkakhi moe lungphu ak kueikhi eng thongna amni awm noeh Jesuh Khrih a thii eng ni thong khi noeh Pa Khawsa a uem kawih angrhui hueihhlurnak ce ni poh pe-khi hue (1 Cor. 6:18-20; Rom 5:9;Rom 6:20-22; Rom 3:24-25;Col 1:14; Eph. 1:7; Eph. 2:13; Heb. 9:12,14; Heb. 9:15-22; Heb. 10:22; Heb. 10:29; Heb. 12:24; 1 Johan 1:7;  Rev. 5:9-10; Rev.12:11).

    Tuh oehtoe nang moe kaa toe rhamsa a thii eng thong na amni awm a dongoeh rhamsa a thii ve ni aa ham tueng hue. Ii a ti oehnum ni ti oehtoe, Khrih eng aok-aa khi boeih ce cimsak kang hoh hue tice Farisaikhi anik kaoknakkhi oeh ni hu tha hue, Farisaikhi engtoe Levitikar 17 khui oeh thii koeh aa a tice hu unoeh yoeih hue u. Cenamoe ni Boipa Jesuh Khrih engtoe a hoeiboeih cimsakna awm hoh hue ti hue (Mk. 7:19; Matt. 15:10-20; Khuetueih.10:9-15). Khrih ak awithanglaek ak cam eng Poluh engtoe Timote a venna vemueihna caa chan pe hue.Khawsa a sehkhi boeih ve aa hamna tueng hue.A lungnak ce sim doena ni aa oehtoe a ii awm ni seh aa ham tueng hue.Khawsa awi akcam moe Khawsa venna awmhlue nak awi qoel doena ni aa oehtoe a hoei cim boeih hue (1 Tim. 4:4-5) ti hue.

    Rhamsa (Tuu, Mee , Vasoei...) a thii ni hamna cimna awm noeh, ni aa tha hue tice Khrih eng a moe thii huhsaknak na ahubatkhi venoeh " Veve ka thii ni aolaw uh" tinoeh amoeh sim poenakna ni aoksakkhi hue. Khrih a thii eng a hoei boeih cimna awm hoh hue (John 6:41-60; Mat 26:27, 28; Mak 14:24; Luk 22:20; 1 Kor 11:25; 1 Kor 10:16).

    Ace a dawngoeh Septaakung Pa Khawsa venna jelnak awi qoel doena ni aa oehtoe a hoei boeih cimna awm hue.