Iatioeh Khawsa eng Abraham ce a caapa a taak chuen eng hueihhlur hamna a thoeh paek num? (Genesis 22:1-2)

Iatioeh Khawsa eng Abraham ce a caapa a taak chuen eng hueihhlur hamna a thoeh paek num? (Genesis 22:1-2)

    Ave a konglam ni poek hlan oeh Baibul eng ak qoel Amoeh Khawsa ve u mueih num ti ce ni sim hamna awm hue. Khawsa ce thlangxing amni noeh, thlangxing a poeknak a thaalamna ak awm moe kawpoek eng amma simtha noengna bi ak bina awm hue.Vemueihna thlang a vennoeh awi a ti ve Khawsa eng thlangxing niinakna ang dangnak, thlangxing amueihna ang dangnak(anthropomorphizing) ni. Ave mueihna ni poek oehtoe Khawsa khan oeh nina poek lonak thawlhkhi boeih nim hlueh hlue hue.

    Khawsa a lungnak moe ak ue-keenak ve thlangxing a lungnak moe ue-keenak a taak nakoeh thupnoeh sang hue.Thlangxing thihnak oehkoeng a thoh tlahsak rhoe mah ni poek oeh thlangxing a hamna toe kawpoek kuei a thaalamna koe thaem ni.Acekkhi eng thlangxing moe Khawsa ni lohanak ak cerna dangsak hue.Thlang eng ve a puei thlang a xingnak lo pe hue, him hue. Ace a him thlang ce amxingsak tha thlah hue. Cenamoe Khawsa engtoe thihnak oehkoeng thohsak tha thlah hue.Ace ce thlangxing moe Khawsa ni lohanak soeih matna awm hue.

    Genesis 22 khui oeh ni huh oehtoe Khawsa eng Abraham a venna a capa a taak chuen Isaak ce hueihhlurnak a hamna ak thoeh paek ni hu hue. Thlangxing dueih huen oehkoe eng ace mueih mat doeng a caanak paek ham ce, tuh oeh Khawsa ak cangna nang dueih huen ngai rhu lah. Khawsa eng thoeh soe amna paek oehnum Khawsa amnak cangnak moe namhlohna awm hlue vik, na paek oehnum mat doengkhoeih na caanakna awm vik ba, kawpoek anim khuikhatkhina awm hlue hue.Cenamoe Abraham engtoe Khawsa anik pe-kung eng ak thoeh cu tinoeh, a capa ce hueihhlurnak a hamna pe hue.Abraham eng a capa ce him hamna am mrhal(cimca ang sang) ce lonoeh him vang a ti oeh ce khan nakoe eng khue lawnoeh,na capa koeh him tina hue.Avoeh poek ham toe “ikoe ti soe Khawsa eng Abraham ce ak noekdak huvoei aw”? ti ni.Ace mueihna a capa him vang a ti hlan oeh a paek amma paek hlue amsim noeh aw(1Johan 3:20)?

    “Tuhoeh Khawsa nak qihcah ti ce sim hue nueng ikoe ti soenum ni ti oehtoe na taak chuen na capa ce amna hai (na capa ce namoeh a hamna amna hloh) a dawngoeh ni(Genesis 22:10).Poek lah Khawsa eng “A cutnak moe a boetnak sim hue”(Isaiah 46:10).Cenamoe thlangxing eng ngaihtuehnak a taak ham ce Khawsa eng ngahna hue.Khawsa eng Abraham eng ikoe mueihnum ak teuh hlue, a capa anik pe hlue tangnum amma nik pe hluenum ti ce Khawsa eng sim oepchoeh hoh hue.A capa kak thoeh pe oehtoe hueihhlurnakna ni pe law hlue hue ti ce Khawsa eng ana sim hoh huvoei soe.

    Ave mueihna Khawsa eng ak thoeh pe ce Abraham ce imueih tluknanum a lungnak ti ce ang dangsaknak matna awm hue. Pa eng a capa a taak chuen ce amoeh a ngahtuehnak ak cam eng, mdekkhan thlang a thawlh phuna banlamtung oeh thih doena uehnoeh, thlangxing amoeh a ventungna a lohnak hlue thlah ang dangsaknakna awm hue. Pa Khawsa eng ngaihtuehnak a taak ve uem ham moe kueihcah hamna tueng tak tak hue.

    Abraham eng ace mueihna a pohnak ak cam eng cangnak oeh a uepawmnak dangnoeh Khawsa ikoe mueih tluknanum a uepnak ti ce dangsak hue. Khawsa ve ak uepawm moe xingnak a hoei hoei a kungna awmnoeh ak thi awm thohsak hlue thlah hue ti ce Abraham eng Khawsa khan oeh a hleem a awm kaana ak thi awm thohsak tha hue ti noeh cangnak a taakna awm hue(Hebru 11:17-19).Khawsa ak cangnak ce a bibinak eng dangsak hue(Jem 2:21-23) Khawsa eng Abraham a noekdak ce Abraham ak kawpoek, a capa ni pe hlue tang huenum, amni pe hlue huenum tinoeh a noekdak amni noeh, Khawsa amoeh a uepawmnak ce Abraham a vennoeh dangsak soe ace ce thlang boeih eng sim u seh ti ce ang caanak ni.

    Genesis 22:12 khui oeh “Tuhoeh Khawsa na qih ce sim nueng” ti hue. A hoei ak awmhlan, ak awmhui moe ak awmlo hlue boeih moe ang huep ang dahkhi boeih ak simkung Khawsa (1Johan 3:20) eng tuhdeng na yaw Abraham ak kawpoek a “sim” lo hue.Amni naa. Khawsa eng ve ana sim boeih hoh hue.tuhtoe “sim” hoh hue nueng tive Khawsa eng amna simnoeh tuhoeh a simlo cuek amni noeh, “Abraham eng cangnak a tak ce Abraham amoeh moe mdekkhan thlangboeih eng ya seh ti noeh ang caanak na awm hue(Genesis 22:18). Khawsa eng Abraham a noekdaknak ve Khawsa amoeh a hamna toe phu amta noeh paxamkhi (Patriarch) moe ak chon ak awmlo hlue nang moe kai a ham doena phu ta hue.Abraham eng thlangthi pateng thohsak hue ti duet oeh Khawsa anak canglonak ce thlang boeih eng a sim hamna Khawsa a ngahnak ni.Ace a dawngoeh Abraham ce “Cangnak oeh Pa” (Rom 3:27-4:25) khuena awm hue.

    Isaak ce hueihhlueihnakna pe hue cenamoe xing hue, ace mueih lorna Khrih ce Banlamtung oeh taina awm soeyawm tho thlah noeh xing hlue hue.Ace huhsaknak a hamna yawm Khawsa eng Abraham a noekdakna awm noeh:Abraham ak cangnak a ceksak ham doengna amni noeh, hailam oeh Pa Khawsa eng a Capa a taakduen ce Kalvari tlang oeh mdekkhan thlangkhi a thawlh phuna hueihhlurnak a poh lo hlue huhsaknakna yawm awm hue.Ace mueihna a Capa Balamtungoeh thi soeyawm tho thlah soe ak xingna avenna a pha hlue thlah ce huhsaknak ni.Ace a dawngoeh Abraham eng,“ Khawsa eng hueihhlurnak a hamna tucaa ce poek law bit kom, ka capa aw.”(Genesis 22:8).